Aquis Querquennis ou como vivían as tropas romanas

Un sitio que nos sorprendeu pola súa magnitude e asombrosa beleza foi Aquis Querquennis, coñecido popularmente por A Cidá, situado no concello de Bande en Ourense, máis concretamente na parroquia de Baños de Bande.

Era, no tempos dos romanos, un campamento romano e unha mansión-viaria (unha hospedería para viaxeiros que percorrían as vías romanas, con cortes para acoller ás cabaleirías), construcións que abarcan do século I ao III d.C. É unha marabilla que se manteña no tempo e se sigan descubrindo máis construccións deste complexo arqueolóxico que prosegue coas escavacións. 

Nin que dicir que é un lugar de soño para nenas e nenos: poden correr polo antiguo campamento e é lugar ideal para xogar ás agachadas. Tamén se converte nun sitio fabuloso para sentar un anaco nesas mesmas pedras e tomar a merenda mirando ao outro lado do grande encoro das Conchas, onde podemos intuir a zona de praia fluvial de O Corgo, no Concello de Muiños, do que falaremos nunha publicación futura.

Como dicía, parecénos incríbel o pouco coñecida que é esta paraxe que nos transporta sen moito esforzo á época dos romanos na Gallaecia. Recomendamos na web do Centro de Interpretación o chamado Mundo dos Nenos, no que a Cooperativa Xeitura -a cargo do centro interpretativo- realiza talleres para converterse tanto en lexionarios romanos coma en inxeñeiros dos antigos camiños romanos que perviven ata hoxe en día.

Iso sí, hai que lembrar que o complexo arqueolóxico foi anegado no seu día debido á construción do encoro das Conchas polo que no inverno pode atoparse baixo as augas, reflectindo así a imaxe dunha cidade a punto de ser descoberta. Nós achegámonos alí en xullo, a época ideal para poder disfrutar de toda A Cidá na súa clara exposición. 

O aceso á cidade de Aquis Querquennis faise pola OU-540 dende Bande ata Porto Quintela, vila na que hai que tomar unha pequena estrada ben indicada á esquerda para achegarnos ao complexo arqueolóxico romano. Aquí unha foto sacada da web do proprio Centro de Interpretación, ben impresionante.