Vila Nova de Cerveira, hospitalidade e elegancia

Adoramos Portugal, país emblemático pola súa hospitalidade, os exquisitos modais da súa xente, a proverbial comida de calidade e o respecto polo patrimonio, que inclúe a perfecta conservación de parques e xardíns. Dito isto, somos hóspedes habituais das súas vilas e cidades. 

Neste caso, acudimos a Vila Nova de Cerveira, pequena vila que tén moitísimo que ofrecer ás nenas e nenos, non só dende un punto de vista lúdico, sino de lecer na natureza e de cultura, sendo como é denominada Vila das Artes. 

Ademáis de estar moi preto de Galicia -so separada de nós polo río Miño-, está moi ben sinalizada debido á famosa feira que se celebra os sábados. Á entrada da vila hai un aparcadoiro xigantesco, situado na Praça do Alto Minho, a escasos 2 minutos da praza principal, a Praça da Liberdade, que alberga un magnolio centenario, mirando cara unha casa moi peculiar "A Casa Verde". Aínda que tentamos atopar información sobre ela, a única que nos deron foi que se chama así pola súa cor, nada máis. Curiosa, nembargantes. 

 Nesa mesma praza está a Igreja Matriz de Vila Nova, de inspiración barroca encalada que destaca branca e imponente contra o ceo e as montañas ao fondo.

O seu casco antigo é fantástico para pasear baixo paraugas pendurados ou adornos de crochet, como foi neste caso. A nenas e nenos encántalles observar como dunha rúa aparentemente normal pódese sacar moito partido con talento e orixinalidade.

A cinco minutos apenas, chegamos ao miolo da nosa visita: o parque de Lazer de Castelinho, toda unha área adicada a nenas e nenos, respectuosa co entorno e moi divertida ademáis de variada:  tirolinas, estructuras de cordas e tobogáns. A sorpresa é un parque acuático gratuíto que poden disfrutar tanto adultos como a cativada. O parque tén zonas de sombra baixo as árbores e mesas para merendas. Está moi coidado e limpo, un detalle que nos depara sempre Portugal. 

Tamén temos a opción dun mini-golf (1 hora por 1 euro) ademáis da oportunidade de alugar karts individuais ou familiares para dar un paseo á beira do Miño.

E se, coma nós, queredes disfrutar do proprio Miño, o noso río máis querido e compartido con Portugal, a mesma empresa que aluga os karts ofrece por precios máis que módicos paseos en barcos silenciosos con guía turístico. Eses barcos son movidos pola enerxía solar, polo que o paseo é totalmente relaxante, co único son da propria auga. Aquí, a ligazón á empresa mencionada Ola Vida.

Tamén se poden alugar bicicletas para percorrer a chamada Ecopista do Río Minho, que non nos atrevemos a facer por escaseza de tempo, pero que deixamos para a próxima visita que sabemos non tardará moito!!

O Castelo de Soutomaior, marabilla de xardíns e de fortín

Tiñamos moitísimas ganas de coñecer de primeira man un dos castelos máis emblemáticos e fermosos de Galicia. Así que ver, e percorrer, e disfrutar do Castelo de Soutomaior e os seus impresionantes xardíns foi un agasallo para nós.

Situado no concello de Arcade, este castelo magníficamente conservado é espectacular. Non imos describir aquí o que tan ben fan na propria páxina do castelo (Castelo de Soutomaior) so comentar que as visitas son moi económicas e realmente pagan a pena (adultos: 2 euros; reducida: 1 euro). A restauración é impecable, coa redacción da súa historia reflectida en cada sala. Encantounos especialmente para xogar -e tamén para admirar- a Galería das Damas. 

As visitas aos xardíns son gratuítas (polo de agora) e constitúen un pracer para os sentidos tamén das nenas e nenos, xa que ademáis de pequenos labirintos hai un estanque con carpas koi e un itinerario entre camelias xigantes digno do xardín botánico que é. 

Ademáis desas famosas camelias -que lle deben o recoñecemento de Xardín de Excelencia Internacional dende 2012- o bosque que circunda o castelo non é menos abraiante: variedades de arbustos ornamentair, loureiros, castiñeiros antigos, liquidámbares outonados, érbedos e carballos irmandados. Como xa dixemos, un verdadeiro agasallo para toda a familia.

Baixando cara o val -ben sabido é que os castelos sempre están nos curutos- atopamos os seus impresionantes viñedos, cuxos froitos escintilan ao sol. Non puidemos resistirnos a observar a impresionante vista e descansar de tantísima emoción.

Mondariz. Moito máis que un balneario.

Mondariz é coñecido polo seu fermoso balneario. Pero dispón a uns 800 metros dun paseo perfecto á beira do río Tea.

Contan que, dende o proprio balneario, logo de tomar as augas na Fonte da Gándara -unha magnífica estructura monumental digna dun palacio das augas- camiñaban disfrutando da beleza de castiñeiros, faias e bidueiros ata chegar á Fonte de Troncoso. 

Aínda que está pobremente conservada, garda moito da súa beleza e é un lugar fantástico polas súas escaleiras enroscadas e os seus pasillos por onde correr sen medo a mancarse. Tamén se pode beber dela, aínda que iso depende do gusto que unha atope nas augas sulfurosas.

Moi pretiño da fonte hai sitio onde deixar o coche e xa pode comezar a aventura.  Imaxinade unha extensión coidada e chan para voar coa bicicleta ou co patinete. Imaxinade os chíos dos paxaros e o son adormecedor das follas das árbores, movidas polo vento. Imaxinade o rebulir dos patos no proprio río Tea. E fontes, de cando en vez. E unha baranda de pedra onde descansar. Imaxinade construcións abandonadas polos homes e polo tempo.